Mizo Students Association Bangalore

“Hmeichhia Leh Uite...” An Ti Maw

Written by Dr. Lalhmingmuana Sailo Sunday, 22 February 2009 18:49

Min hmangaih em em tu Ka nu hriatreng nan…

Kan thupui han en khian mipa ziak ni awm lo tak a ni a. Tin a thumal hmasa ber ‘Hmeichhia’ han tih khian tu te emaw chuan an helh deuh awl awl mai thei. Ka inthlahrung ve deuh hlek bawk….mahse kan Bible-in a lehlin hnuhnung ber thlengin ‘Hmeichhia’  a la tih tlat avangin ka huai ve leh lawi si a. Chuvangin, ‘Hmeichhia’, kan ti zel tawh mai a ni ang chu...

Hmeichhia han tih bawl bawl mai hi chu, a dik chiah chuan a no fahran lo khawp mai. Mahse thlakna thumal dang (vantlang pawmtlan) kan la nei thei silo a. Tam tak enghelh leh thlak an chak pawh a ni reng a, inhnialna pawh kan neih fo thin hi. ‘Minu’ tih duh pawl an awm laiin, mi thenkhat in, “Minu’ tih te chu hmeichhe sawina niloin, mipa, pa famkim lo sawina a ni”, an ti ve thung a. Nge vawksa pawh sapin Pork an ti a,  a tuina a dang chuang hlei nem tiraw??!! Tin he thumal pahnih hi ka sawi tum ber pawh a ni lo a. A duh in ‘Hmeichhia’ lo tise a duh lo in ‘Minu’ lo ti raw sek sek, ka pawi an sawi lo!!. Ka sawi tum erawh chu...

Lengi te tello chuan...

Tlangvalte chakna thahrui hian a daih rei thei lo a, tin hmeichhe tel lo chuan Pa a awm theih loh kan ti thei ang. Biakin a kal a phurawm loh a, College kal lah a nuam bawk hek lo. Tlangval dangin, “I thawmhnaw chu a va nalh, I va’n in hmeh”, a tih aiin nula in he thu ngai tho a sawi hi a ngaihnawm in, a ngaihthlak a nuam fe zawk. Chutiang bawkin hmeichhia pawh mipa tello chuan an awm thei bik lo a; in mamawhtawn a siam kan nih tlat vang a ni. Ama’rawhchu tun tum ah hi chuan hmeichhia te kan dah pawimawh bik ang. An tangkaina leh an thatna ka fak ang a, tin ka fuih in ka zilh anga, an tlinlohna leh an fellohna ah te ka hau ang a, a hua hua sih hlawk ah...

Mizo tlangval fiamthu...

“….Hmeichhia leh Uite a chul nel peih peih; Hmeichia leh palchhia te chu a thlak theih”, ti zut zut tlangval hi tlangval luck an ni ngailo a. Hmangaihna tak tak hrethiam lo, engemaw beisei vang a nula be lawr dun dun, an ni duh. Tin an in sawi luck ang in an luck lo tlangpui bawk. He kan tlangval(keipawh) fiamthu hi thu tak khukpui vak chi a nilo a, fiamthu a nih ang in a hua pawh kan awm lo tur ah ka ngai.

Mi a in, ‘Ka a’, a ti duh bik lo a. Chutiang chiah chuan tlangval luck-in ‘Ka luck’, a ti zut zut ngailo. A lo luck a nih pawhin a thian hnai te’n, “Nang hi chu I luck bik ngawt mai chuti khati…”, pawh lo ti mahse, mizo tlangval chhanna chu, “Ka luck em ni?, nang ni zawk a lom luck”, tih a ni daih ang. Chuvangin Mizo tlangval te fiamthu pakhat kum hnihkhat kal ta a MHIP in an han khap vel te kha ho ka ti. Fiamthu an haw ngailo. Tin ‘Hmeichhia leh Uite’ tih hla an huat lai a sa lartu ber lah kha an hmeichhe pui tho a ni lehnghal.

‘Hmeichhia leh Uite a chul nel peih peih’ an tih hi kei chuan ti hian ka ngai. Mi min hmangaihtu leh kan tan a engkim huam a min duh ngawih ngawih tu, an hun seng a min vil leuh leuh tu lo duh loh hi sual ka ti. Joyce Meyer-in January thla Peace Festival-a an nupa chungchang a sawi kha ka hrechhuak a, ropui ka ti. A pasal in a hmangaih a, atan hun a sen tam zia leh, thil a duh ang a tih sak nasat zia te kha , a niin a induh khum vel a. Mahse amah hmangaihtu tak tak chu a induhkhum rei theilo, a hmangaihtu nen chuan inneiin tun thleng hian khawvel nupa a lar ber pawl an ni. Tin Joyce Meyer-i paw’n rawng a bawl theihna chhan chu a pasal amah hmangaihtu kha a ni tlat. Hetiang chiah hian min hmangaihtute induhkhum a lo inlak khum ai chuan lo hmangaih let ve hi a tha zawk fe lo maw?? Uite mai maiin hmangaihtu leh lainattu, kawmneltu a hriat chuan hmeichhia te ngat chuan hre lehzual tur in ni.

Hmeichhe finin tuikhur ral a kai lo...

Kan la ti tak deuh deuh…Chauhthubarawh mai mai a ang ta…Kan khawpui chhung Office lut ila, nula leh nu an tam a, dawr ah nise hmeichhia dawrnghak an tam. Lehkha zirna lamah nise a ti tha zawk an ni chho zel ti tih a. Kan khawtlang nun ah an dinhmun a sang chho zel a. Kan mizo hmeichhia te hi in chuan awm tak zet.

Mi thenkhat ancheh deuh in ramhruaitu MLA hmeichhia kan duh chuti khati,, an ti erawh hi chu ka thlawp lo. A chhan chu MLA nih duh chuan Party ah an in hmang a nih loh vek leh MLA ni thei turin theihna an neih phawt chuan nawr ngailo in an tling thei. Central ah reng hmeichhia hruaitu lawk tak tak an tam. Tin kan ram ngei ah pawh Secretary te pawh an awm chho zel a. An duh phawt chuan MLA chu an ni thei, nawr a ngailo.

Thufingte 12:4...

“Hmeichhe khawsak tha chu a pasal tan lallukhum a ni”, a ti a. Kan Bible meuhin a sawi si a, hmeichhia te hi in pawimawh takzet a ni. Chhungkaw zahawmna leh mawina in kut ah a awm a, Tin Thufingte 14:1 phei chuan, “Hmeichhe fing zawng zawng in in an sa”, a ti deuh deuh. Mizo hnam kalphung ah, insa turin hmeichhia an thawh chhuah ngai kan hrelo. Chuvangin Home sweet Home a cheng thei tur chuan NU in pawimawh. An sawi fo thin: In lian leh ropui, a chhung a cheng te in ngeihlohna chu ‘suamhmang puk lianpui’ ang chauh a ni an ti thin. Chuvangin in inchhhung chenna nuam leh hlimawm, khawilo kal chhuah pawh a haw nghahhlelh awm tak a siam thei tur chuan chhungkawnu te hian tih tur in va nei tam em!.

In tawngkam...

Nu vin tak leh thinawrh tak chenna inchhung a chen hi a nuam ngailo. Nu ber a vin reng chuan midang pawhin tawngkam vin an hmang lo theilo a, chu chuan chenhona boruak a ti chhhia a. Mahni inchhungkhur pawh nuam ti lo a in fate an awm hun meuh chuan tunlai tawng takin Future a bright lo ve khawp ang.

“Chhanna nem in thinur a tikiang” tih hi a dik fo thin. I pasal thinrimin vin khur khur mah se I thinrim pui ve tlat loh chuan an thin a rim rei thei lo, mi thinchhia hrim hrim a nih ngawt loh chuan. Chhungkawpa ber a thinrim a, nu ber a thinrim ve ngat chuan…!##??***!!!….a ni mai.

Bible atanga hmeichhia in pawimawhna...

Hmeichhe rinawm leh entawntlak chanchin tam tak kan chhiarin kan zir thin a. Mahni hnam tan a himna thawkchhuak thei fahrah nula, Lalnu Estheri te, hmangaihna hmasa bansan duh lo a, pasal te nu hrehawmna karah pawh pui a vuan tlat a, a tawp a Isua Krista thlahtute zing tel ta Ruthi te, Nula thianghlim Mari, Mihring sual a tlu tawh te tana chatuan nunna kan neihna kawng min hawnsak tur a Isua hringtu ni ta te leh mi dang tam tak kan hmu. An fakawm in an nun ah hian zir tur tam tak a awm.

Hetih rual hian Evi vangin Adama chu sual a thlemin a awm a, Pathian anchhia a dawng hial a. Lalnu Jezebeli suahsual vangin Lal Ahaba’n sual rawng a bawl a, Solomona lal ropui leh fing pawh a nupui te vangin Baal biain Pathian a hawisan hial bawk.

Kan hriat tawh leh kan vawn hlui tawh te chanchin ka sawi pawh a ni thei. Heng kan sawi atang hian chhungkawnu in pawimawh zia ka sawi duh. In pasal te hi nangmahni hmangaihtu te an nih avangin in tan an theihtawp chhuah a in hlimna leh lawmna siam sak che u an duh. Chuvang tak chuan in pasalte kawng dik leh kawng diklo in zawh tir thei. Thenawmnu thil neih ang hlawhin a phak siloh i it a i sawi i sawi chuan, chhungkawpa ber tan chuan phak tawk chuang liam a sum thuaikawi tur zawn mai a awlsam ngei ang. Thahrui nei tlem zawk ni mah ula in nem leh in no poh leh thil in ti thei mai si a. Chuvangin chhungkaw entawntlak, vantlang leh ram siamtha tur a bul tantu ni tura hma la zel turin ka sawm che u a ni e.